CEBU CITY- Nagpahigayon og sunodsunod nga pagbisita si Lieutenant General Fernando M Reyeg, ang Commander sa Visayas Command (VISCOM) sa mga unit sa Eastern Visayas, aron mapausbaw ang moral sa mga tropa ug masustiner ang epektibong command and control.
Ang pagbisita naglangkob sa Headquarters sa 803rd Infantry Brigade sa Catarman, Northern Samar; ang Headquarters sa 87th Infantry Battalion sa San Jose De Buan, Samar; ug ang Headquarters sa 8th Infantry Division sa Catbalogan City, Samar.
Kini nga inisyatiba nagtumong sa pagsuta sa nagpadayon nga kampanya sa seguridad ug kalig-on sa Eastern Visayas ug ang kaandam sa mga tropa nga gitahasan sa mga katungdanan sa eleksyon alang sa umaabot nga 2025 mid-term National ug Local Elections.
Gihatagan og gibug-aton ni Reyeg, nga ang kritikal nga tahas sa Armed Forces of the Philippines (AFP) sa pagsuporta sa Commission on Elections (COMELEC) ug sa Philippine National Police (PNP) atol sa eleksyon.
Mokabat sa 2,848 ka mga personahe ang nabutang sa alerto, andam motabang sa COMELEC ug PNP sa pagsiguro sa patas, hapsay, ug kasaligan nga eleksyon.
Ang pagbisita gipasiugda uban ang pag-ila sa 25 ka mga Opisyal ug Enlisted Personnel alang sa ilang sulundon nga serbisyo.
Lakip niini, pito (7) ang nahatagan og Gold Cross Medal alang sa gallantry in combat, unom (6) ang nakadawat sa Silver Cross Medal alang sa talagsaong kalampusan sa special operations, ug 12 ang gipasidunggan sa Gawad sa Kaunlaran Medal alang sa ilang mahinungdanong kontribusyon sa socio-economic development. (BOMBO IRENE ARDIENTE)
