CENTRAL VISAYAS- Gradwado sa University of the Philippines (UP) Cebu ang usa sa pito ka mga tawo nga namatay sa hiniusang operasyon sa militar nga gipahigayon sa Barangay Tapi, Kabankalan City, Domingo sa buntag, Abril 27, 2025.
Giila siya nga si John Isidor Supelanas, alyas Dalia, Communication graduate sa University of the Philippines Cebu, transwoman activist ug student leader.
Basi sa pamahayag sa Tug-ani, UP Cebu si Supelanas aktibo sa nagkalain-laing organisasyon sa mga estudyante ug naghupot sa mga tahas sa liderato sa iyang panahon sa unibersidad, lakip na ang pagserbisyo isip representante sa University Student Council (USC) ug isip Chairperson niini. Nominado usab siya isip 38th Student Regent Nominee sa UP Cebu.
Nasuta usab nga gawas sa unibersidad, nalambigit si Supelanas sa mga organisasyon sa kabatan-onan ug sektoral, lakip ang National Union of Students of the Philippines, KASAMA sa UP, Anakbayan UP Cebu, ug Kabataan Partylist Cebu. Aktibo usab siya sa mga kampanya batok sa militarisasyon sa kampus, ang pagpabuhi sa Mandatory ROTC, ug ang pagpasiugda sa mga katungod sa LGBTQIA+.
Ang laing mga namatay giila nga sila si Reniel Locsin Cellon, alyas Kumpol; Mary Jane Maguilat, aka Shonie.
Ang operasyon gipangulohan sa 302nd Infantry Brigade sa Philippine Army ubos ni Brigadier General Joey A. Escanillas, ug gipahigayon uban sa hiniusang pwersa gikan sa 11th, 15th, ug 47th Infantry Battalion.
Gitino sa Philippine Army, nga ang operasyon kabahin sa ilang padayong paningkamot sa pagbungkag sa mga armadong rebeldeng grupo nga naglihok sa Negros Occidental. Walay gikataho nga kaswalti sa gobyerno atol sa engkwentro.
Subay niini, si Lt. Gen. Fernando Reyeg, commander sa Visayas Command, nikutlo sa ilang walay puas nga kampanya batok sa Communist Party of the Philippines-NPA.
Subling giawhag niini ang mga salin sa New People’s Army sa Isla sa Negros nga mosurender tungod sa grabeng hampak nga gipahamtang sa komunistang-teroristang grupo.
Kini nga operasyon kinahanglang magsilbi nga usa ka wake-up call sa mga mipili pa nga mosuporta o mosalmot sa Communist Party of the Philippines-New People’s Army (CPP-NPA). Walay hunong nga gukdon ug i-neutralize nila ang tanang armadong rebelde.
