PROVINCE OF BOHOL– Gipatuman sa kapolisan sa Probinsiya sa Bohol, ang hugot nga seguridad pipila ka adlaw sa dili pa ang National ug Local Election karong Mayo 12.
Mao kini ang gipaambit ni Police Lt. Col.Norman Nuez, tigpamaba sa Bohol PNP, nga usa sa ilang gipaniguro mao nga ang matag polling center adunay polis nga nagbantay.
Gawas sa presensya sa kapulisan, ipakatap usab ang investigation team ug quick response team.
Dugang pa, nga hugot usab nga seguridad ang ihatag sa mga opisyal ug personnel sa COMELEC, ingon man sa mga elected officials ug mga kandidato.
Hinungdan nga ilang gipasalig nga lig-on nga seguridad ang gipatuman aron mapadayon ang kahapsay ug kalinaw sa probinsiya.
Gani, isip kabahin sa misyon aron masiguro ang luwas ug hapsay nga pagpahigayon sa 2025 National ug Local Elections, ang Bohol Police Provincial Office nangulo sa usa ka dako nga Simulation Exercise (SIMEX) niadtong unang semana sa Mayo.
Kung diin gisulayan sa ehersisyo ang pagtubag sa mga security and emergency agencies sa lainlaing mga senaryo nga may kalabotan sa eleksyon nga adunay peligro.
Gipamatud-an usab sa BPPO ang ilang pasalig sa proactive, coordinated, ug community-focused efforts aron masiguro ang malinawon nga 2025 elections sa Bohol.
