Gipasalig sa buhatan sa National Food Authority – Central Visayas (NFA-7) ngadto sa publiko nga luwas ug dekalidad ang bugas nga gipamaligya sa mga lokal nga kagamhanang nga nagkantdad og P20 per kilo.
Kini ang pamahayag nga gibuhian ni NFA-7 Assistant Regional Director Pilita Barajan nga matod pa mandato sa ilang ahensya ang dili pagpagawas og suplay sa bugas nga dili pwedeng kanoon sa tawo.
Gipasabot niini nga ang klase sa bugas sa NFA kay lahi kun itandi sa commercially available premium rice tungod kay dili kini imported ug lokal nga ani sa mga mag-uuma sa nasod.
Tataw niini nga bisan paman sa kalahian sa gigikanan sa maong mga bugas kay ang lokal nga ani ug imported rice kay halos parehas ra ang hitsura nga maoy usa sa mga gipanglantaw sa mga konsumidor.
Dugang pa sa opisyal nga aduna silay mga Quality Assurance Officers nga maot mosiguro sa kalidad ug kaluwas sa ilang bugas nga anaa sa ilang mga bodega subay sa safety and quality standards sa ilang ahensya.
Ang maong pamahayag sa NFA-7 kay reaksyon batok sa mga pagsaway sa kalidad sa NFA rice nga nikatap sa social media sa wala pa nalusad ang P20 per kilo nga bugas nga gipasiugdahan sa Sugbo sa unahang bahin sa buwan sa Mayo.
