CENTRAL VISAYAS- Gipahibalo sa Department of Health Central Visayas ang publiko nga dili kinahanglan nga mahadlok o maalarma sa pagkaylap sa sakit nga Monkey POX, ug dili sila direktang modawat og impormasyon, ilabi na ang mga dili lehitimo, nunot sa “fake news” lockdown.
Kini ang gibutyag ni Regional Director Dr Joshua Brillantes sa Department of Health-7 atol sa gipahigayon nga tigom sa Cebu City Hall human gikataho nga adunay lima ka gidudahang kaso sa Mpox sa dakbayan sa Sugbo.
Kini human usab sa kompirmasyon nga upat ka mga indibidwal ang kasamtangang gipaubos sa hospital isolation tungod sa gidudahang kaso sa monkey pox.
Diin gikompirmar ni Cebu City Mayor Raymond Garcia
nga upat ka mga indibidwal ang kasamtangang gipailalom sa hospital isolation ug ang mga sample gikan sa mga pasyente, ug gisumiter na ngadto sa Research and Institute for Tropical Medicine (RITM) alang sa confirmatory testing.
Kalabot niini, gipirmahan ni Garcia ang Executive Order 19 ubos sa Section 16 o ang pagtukod og Inter-agency task force batok sa Monkey pox (Mpox).
Matod sa EO, ang task force maoy responsable sa pagmonitor ug pagtubag sa mga kaso sa Mpox sa siyudad, pag-andam ug emergency plan, pagsusi sa mga lugar nga adunay kompirmadong kaso sa virus, pakig-alayon sa mga ahensya sa nasudnong kagamhanan, ug pagsumite sa mga ordinansa ngadto sa konseho kalabot sa maong sakit.
Busa giawhag sa mga opisyal sa DOH ang publiko nga magpabiling kalmado apan mabinantayon, magpraktis og saktong kalimpyo, likayan ang suod nga pakig-uban sa mga tawo nga adunay mga sintomas, ug i-report dayon ang bisan unsang gidudahang kaso sa mga awtoridad sa panglawas.
