Kasamtangang nagdunggo sa Port Area, Manila ang duha ka Japanese destroyer alang sa tulo ka adlaw nga port visit niini sa nasod.
Kini nagpakita sa pagpalawom sa relasyon tali sa naval forces sa Pilipinas ug Japan human sa ratipikasyon sa Reciprocal Access Agreement (RAA).
Ang ‘JS Ise’ (DDH-182) kay usa ka Hyuga-class nga helicopter destroyer, ug ‘JS Suzunami’ (DD-114) nga usa ka Takanami-class destroyer nga miabot sa Manila Port sa alas 10:30 sa buntag iadtong Sabado, Hunyo 21 isip kabahin sa Japan Maritime Self-Defense Force’s Indo-Pacific Deployment 2025 nga gitumong sa pagpalig-on sa tanan nga kooperasyon sa nasud ug rehiyon pinaagi sa joint force exercises.
Ang mga personahe sa Philippine Navy nga giubanan sa Navy band ni-welcome sa Japanese navy.
Matod ni Rear Admiral Natsui Takashi, commander sa Japanese Maritime Self-Defense Forces Escort Flotilla Fourm, ang port call nagsimbolo sa pasalig sa Japan nga suportahan ang PH ug uban pang mga nasud nga parehas og hunahuna sa pagpadayon sa usa ka gawasnon ug bukas nga Indo-Pacific region.
Giklaro ni Admiral Takashi nga ang deployment sa 2 ka Japanese destroyers wala gitumong sa bisan unsang partikular nga nasud ug naglaum nga kini usa ka oportunidad sa pagpalambo sa bilateral defense cooperation ug exchanges aron makab-ot ang usa ka libre ug bukas nga Indo-Pacific.
Kini ang ikatulong pagbisita sa Japanese navy sa nasud karong tuiga samtang kini ang ikaduhang pagbisita sa ‘JS Ise’ nga nihimo kaniadto og port visit sa Subic niadtong 2017.
Samtang, ang mga pwersang Hapones nakatakdang mopahigayon ug naval exercises uban sa Philippine Navy aron mapalig-on pa ang ilang interoperability ug nagpakita sa pagpahigayon ug dugang naval engagements uban sa ilang PH counterparts ubos sa RAA.
Ang pagbisita sa mga Japanese destroyer sa nasud nunot sa laing pagpanghasi sa usa ka barko sa China Coast Guard (CCG), nga mihimo og water cannon attack batok sa mga barko sa Pilipinas sa Panatag shoal o Bajo de Masinloc niadtong Hunyo 20, samtang nag-apod-apod og fuel subsidy sa mga mananagat nga Pilipino sa maong dapit.
Samtang, gipahibalo ni Admiral Takashi nga ang iyang Navy nag-obserbar sa mga kalihokan sa naval forces sa China sa gikalalisan nga kadagatan, lakip na ang kadagatan sulod sa exclusive economic zone (EEZ) sa Pilipinas.
