Dakong posibilidad nga mahimong babag sa bag-o lang gisugyot nga resolusyon sa konseho sa Dakbayan sa Sugbo ang “National Security” sa pagpa-abli sa access road sa Camp Lapu-Lapu nga maoy Headquarters sa Armed Forces of the Philippines – Visayas Command (AFP-VISCOM).
Kini ang gipamulong ni Lt. Col. Israel Galorio, ang tigpamaba sa AFP-VISCOM atol sa eksklusibong pakighinabi sa Bombo Radyo Cebu Newsteam diin gisaysay niini nga ang rason sa limitasyon sa pagpa-agi sa publiko sa maong dalan nga mukonektar sa Lahug ug Banilad-Talamban kay tungod sa National Security diin ang maong kampo maoy base-military sa kasundalohan sa tibuok Visayas.
Apan mipahayag gihapon sa iyang pagrespeto ang AFP-VISCOM sa katuyuan sa maong resolusyon nga nagtinguha rang ipagaan ang lakat sa trapiko sa maong dapit tungod kini kay usa sa mga highly populated areas sa dakbayan.
Masaligon si Lt. Col. Galario nga sa pagtuki niini sa Sangguniang Panlungsod sa Kagamhanang Dakbayan ilabi na inig public consultations kay mahisgutan ang security protocols sa mga sakop sa armadong kusog usa ablihan sa publiko ang maong dalan nga prioridad sa nasudnong interes.
Kahinumduman nga niadtong Miyerkules, Hulyo 9, nipasar og resolusyon sa konseho si Cebu City North District Councilor Harold Kendrick Go sa sugyot ngadto sa Office of the President isip Commander-in-Chief sa AFP nga paablihan ang maong dalan aron mu-decongest sa bug-at na nga dagan sa trapiko sa Banilad-Talamban road ning dakbayan sa Sugbo.
