CEBU CITY- Nanawagan og hustisya si Consolacion Pitogo, inahan sa 19-anyos nga si Lorie Faith Cabatingan Pitogo, nga gidunggab ug gipatay sa iyang kapuyo niadtong gabii, Hulyo 15, 2025, sa Sitio Sunflower, Barangay Tisa, Cebu City.
Nailhan ang suspetsado nga si Mike Lasanas, 22-anyos ug lumulupyo usab sa maong dapit. Human sa insidente, kini misibat ug karon padayon nga gipangita sa kapulisan.
Sa pakighinabi sa Bombo Newsteam, naghilak si Ginang Pitogo samtang nanawagan kang Mike nga mosurender na aron mahatagan og hustisya ang kamatayon sa iyang anak.
“Wala nalang unta niya gidunggab akong anak, bisan pa og gidapatan lang,” iyang gisaysay uban sa kasakit.
Gibalik-balik usab niya ang mga kayo nga ilahang gipakita kang Mike kaniadto, bisan paman nga gidapatan niini ang iyang anak.
Puno sa kasubo si Ginang Pitogo samtang naghunahuna kung unsaon na lang pag-atiman ang duha ka mga anak sa biktima nga mga gagmay pa- ang usa gani nag-breastfeed pa.
Matud pa niya, sa wala pa ang krimen, permi na nga nag-away si Lorie ug ang suspetsado, tungod sa kakulang sa trabaho ni Mike ug ang kasagarang pagpanapat niini.
Maong nagbulag ang duha, apan sige gihapon og balik-balik sa ilang balay si Mike aron makigbalik kang Faith.
Gi-blotter na niadtong panahona si Mike sa barangay, apan wala kini gipa-preso sa pamilya tungod kay malooy sila gumikan sa mga bata.
Sumala sa imbestigasyon sa Labangon Police Station, nag-away ang duha ug nahimong mainit ang panaglalis hangtod misangpot sa pagdinunggabay, nga maoy hinungdan sa kamatayon ni Lorie Faith Pitogo.
Gipangayo karon sa pamilya ang tabang sa publiko aron makita ang suspetsado. Gipost na usab sa social media ang litrato ni Mike Lasanas ug gi-awhag ang bisan kinsa nga adunay kasayuran sa iyang nahimutangan nga ipahibalo kini dayon sa mga otoridad.
