MANDAUE CITY,CEBU- Nasikop ang duha ka high-value target sa ilegal nga drugas sa joint buy-bust operation sa kapulisan ug PDEA sa Mantawi Drive, North Reclamation Area, Barangay Subangdaku, Mandaue City, Agosto 1, 2025.
Kung diin, nasakmit sa mga otoridad ang gibana-banang upat (4) ka kilo sa gituhuang shabu nga adunay market value nga ₱27.2 milyones.
Giila ang mga suspetsado sa ilang mga alias nga “Siwsiw,” 54-anyos, lalaki, balo, lumad sa Negros Occidental ug temporaryong nagpuyo sa Tungkil, Minglanilla, Cebu; ug “Daidai,” 47-anyos, babaye, balo, nga taga-Tungkil, Minglanilla, Cebu.
Atol sa pakighinabi sa Bombo Radyo Cebu team, kang PLTCOL Mercy Villaro, tigpamaba sa Mandaue City Police Office, gitino niini nga si “Siwsiw” giila nga usa ka Regional Level High-Value Individual (HVI) sa listahan sa kapulisan.
Dugang pa, nga ang operasyon gihimo sa koordinasyon sa City Drug Enforcement Unit (CDEU), Criminal Investigation Unit (CIU) Mandaue, Regional Intelligence Division 7 (RID7), Philippine Drug Enforcement Group 7 (PDEG7), ug sa Philippine Drug Enforcement Agency – Region 7 (PDEA RO7).
Kasong kalapasan sa Republic Act 9165 o ang Comprehensive Dangerous Drugs Act of 2002 ang ipasaka batok sa mga nadakpan.
