Gipaambit sa PCG-WPS spokesperson Commodore Jay Tarriela ang video nga nagpakita sa Chinese’ People’s Liberation Army-Navy warship nga nagkaunay og bangga ngadto sa China Coast Gaurd nunot sa pagpangsaywar ug harass niini sa BRP Suluan sa Pilipinas.
Sa gikabutyag ni Tarriela, ang PCG nitanyag dayon og suporta kabahin niini lakip na ang pagtunol og tabang sa man-overboard recovery ug medical nga mga hinabang sa mga naangol nga mga tripulante sa CCG.
Apan, sa maong panagbangga sa warships sa China, gikalipay kini sa Co-convenor sa Atin Ito coalition ug Akbayan president Rafaela David ang nahitabong bangga sa duha ka barko sa China sa Bajo de Masinloc gahapong adlawa.
Nunot sa insidente, niingon siya nga ‘DASURV’ kini o haom lang sa mga barko sa nasod sa China nga naningkamot nga maangkon ang teritoryo sa Pilipinas.
Matod pa niya nga nagpakita lamang kini nga walay luna ang mga nanghasi sa kadagatan sa Pilipinas, ug makonsiderar nga ‘karma’ ang maong insidente.
Dugang pa, gikuwestiyon usab ni Atin Ito coalition Co-Convenor Rafaela David ang lakang sa China nga nakahatag ug kahadlok sa kinabuhi sa kaugalingong mga personahe niini.
Samtang sa susamang higayon, nipadayag siya sa iyang pagdayeg ug pagsaludo sa mga personahe sa Philippine Coast Guard nga nakigbisog alang sa katungod sa nasud. | Bombo Irene Ardiente
