CEBU CITY- Gikalipay sa pipila ka mga opisyales sa barangay sa Dakbayan sa Sugbo ang pagpirma ni Presidente Ferdinand “Bongbong” Marcos Jr. sa balaod nga nag-postpone sa Barangay ug Sangguniang Kabataan Elections (BSKE) gikan sa orihinal nga iskedyul karong Disyembre 2025 ngadto sa Nobyembre 2026.
Kini ang gipamahayag ni Cebu City Ex-Councilor ug Association of Barangay Councils (ABC) President Franklin Ong sa eksklusibong pakighinabi sa Bombo Radyo Cebu Newsteam.
Matod pa niya, gikalipay nila sa iyang mga kauban nga barangay officials ang maong desisyon sa presidente.
Sumala ni Ong, ang maong balaod magtugot sa tibuok tulo ka tuig nga pagserbisyo sa mga opisyales nga napili niadtong Oktubre 2023.
Dugang pa niya, dako usab kini nga bintaha kung mahimo nang upat ka tuig ang termino sa mga barangay officials aron malungtaran ang ilang pagpatuman sa mga proyekto ug programa sa ilang lokalidad.
Sa laing bahin, mipahayag usab si Atty. Francisco Pobe, ang Regional Director sa Commission on Elections (COMELEC) Central Visayas, nga andam ang ilang buhatan sa orihinal nga iskedyul sa piniliay karong Disyembre.
Matod niya, dili mausik ang ilang mga pagpangandam ug posibleng magamit pa kini ilabi na sa pagpalugway sa panahon sa rehistrasyon.
