Mipahimangno sa mga lumulupyo sa dakbayan sa Sugbo si Cebu City Councilor Dave Tumulak, ang Chairman sa Committee on Disaster Management sa Cebu City Council kabahin sa hulga sa mas dakong bunok sa uwan tungod sa gipanglantawang La Niña nga masinati sa umaabot nga buwan.
Kini ang gipamahayag ni Tumulak atol sa eksklusibong pakighinabi sa Bombo Radyo Cebu diin gisaysay niini nga angayng pangandaman dili lamang sa kagamhanang dakbayan apan lakip sa matag pamilya ang maong hulga sa katalagman alang sa kaluwasan.
Hilabi na sa mga lumulupyo sa kiliran sa mga suba o bakilid nga yuta tungod sa hulga sa baha ug landslide.
Gani dugang sa opisyal nga gipaspasan na nila karon nga declogging ug desilting sa mga agianan sa tubig sa nagkadaiyang barangay aron maminusan ang risgo sa baha.
Ingon man nga giila niini ang mga personahe sa mga barangay nga mao gani ang nangunay manglimpyo sa mga suba duol sa ilang mga lugar.
