Naangol ang kapin sa 30 ka mga tawo human nag-wild ang mga nagprotesta nga nagmaskara sa Ayala Bridge sa Manila kaniadtong Domingo sa hapon, diin ang mga nagprotesta nisuway usab pag-abot sa Mendiola subay sa dalan duol sa Malacañang sa dihang nagsugod ang kagubot.
Nagsugod ang tensiyon sa dihang ang pipila ka batan-ong lalaki nagdagkot og ligid atubangan sa usa ka shipping container nga gigamit ingong barikada sa kapolisan.
Samtang, adunay 17 usab ka tawo ang gidakop ug pasakaan og kaso human giingong nanglabay og mga bato ug nagsunog sa trailer truck atol sa anti-corruption protest sa Mendiola, Manila sa susamang adlaw, sumala sa Philippine National Police (PNP).
Ang maong 17 ka mga dinakpan anaa karon sa kustodiya sa Manila Police District (MPD), ug sa usa ka pahayag, gipasiugda sa PNP ang pagrespeto sa katungod sa mga lungsuranon sa pagpahayag sa ilang mga opinyon, apan nanawagan alang sa kalmado ug paglikay sa kapintasan.
Adunay usa ka hotel usab sa Mendiola, Manila gisulod ug gisunog sa mga nagprotesta tungod sa giingong hulga sa pagpamusil gikan sa usa ka tawo nga nagtago sa hotel, apan diay, giingong nangawat og vault ug gipugos sa grupo ang pagsulod sa establisemento ug gisunog ang gawas nga bahin sa building.
Sa pikas bahin, human nga ang pipila ka mga batan-ong raliyista nisuway pagguba sa Ayala Bridge, ang Manila Disaster Risk Reduction and Management Office (MDRRMO) ug Department of Public Services (DPS) nipahigayon dayon og flushing ug clearing operations aron paglimpyo sa lugar.
Matod ni Manila Mayor Francisco “Isko Moreno” Domagoso, pipila ka mga nagprotesta ang nanglabay og dagkong mga bato, buak nga botelya, ug uban pang basura sa Police District (MPD) nga gipakatap sa lugar.
Lakip usab sa gilimpyohan mao ang Liwasang Bonifacio human sa mga aktibidad nga may kalabotan sa protesta batok sa korapsyon.
Subay niini, ubay-ubay usab nga mga raliyesta ang nagpakapungot ug gipangsikaran ug gibato ang pipila ka personahe sa kapulisan.
