Mimando si Cebu Provincial Governor Pamela “Pam” Baricuatro sa terminasypn sa 13 ka mga proyektong pang-imprastruktura sa Kagamhanang Lalawigan.
Gianunsyo kini sa opisyal atol sa senimanang pamahayag niini sa Kapitolyo niadtong Miyerkules, Septiyembre 24 diin matod pa nga padayon pa silang nag-audit sa 154 ka mga proyektong gisuspenso sa sayong bahin karong tuiga.
Gipasabot niini nga ang maong mga proyekto kay gipahunong mahitungod sa pipila ka mga kakulian sama sa right-of-way o ang hilabihang pagkalangay na sa pagtapos niini.
Pipila lang sa mga proyektong gipahunong kay ang mga road concreting sa mga lungsod sa Daanbantayan, San Francisco – Camotes, Dalaguete, ug Dumanjug; ingon man mga multi-purpose buildings sa Aloguinsan, syudad sa Toledo, ug Pinamungajan; ug mga solar lights installation sa Consolacion, Cordova, ug syudad sa Mandaue.
Saysay ni Baricuatro nga ang mga proyekto kay nagbalor sa dili muubos sa P1-milyones ngadto sa dul-an P6-milyones.
Gihimug-atan sa gobernadora nga responsible ang mga konkraktor sa maong mga proyekto kansang napakyas sa paghuman ug mamahimong mag-atubang og mga silot subay sa lagda sa balaod.
