Putin, giangkon nga sila ang nagpaluyo sa pagkahagsa sa Azerbaijan jet nga nakapatay sa 38 ka mga tawo

Giangkon sa President sa Russia nga si Vladimir Putin nga sila ang nagpaluyo sa pagkahagsa sa usa ka Azerbaijani jetliner kaniadtong Disyembre nga nakapatay sa 38 ka mga tawo.

Ang Presidente sa Russia miingon nga ang ilang mga air defense gilusad aron target ang drone sa Ukraine apan nibuto kini duol sa eroplano sa Azerbaijani Airlines.

Gikan kini sa Baku, Azerbaijan ug gikatakdang modunggo sa Chechnya sa Russia niadtong Disyembre 25, 2024 dihang nahitabo ang insidente.

Gihimo ni Putin ang pag-angkon atol sa iyang pakigtagbo kang Azerbaijani President Ilham Aliyev nga gipahigayon sa Dushanbe, Tajikistan.

Gipasalig ni Putin nga iyang silotan ang nagpaluyo sa pagkahagsa sa ayroplano ug mohatag usab og tabang sa mga biktima.