Nasuko, nakulbaan, apan nagpabiling lig-on ang usa ka estudyante human makadawat og subpoena gikan sa korte, human siya misalmot sa protesta atubangan sa buhatan sa DPWH Region 7 nga nagtinguha batok sa isyu sa korapsyon.
Matod ni Jian Rick Tagalog Pelayo sa Kabataan Partylist–CNU, wala gyud niya damha nga makadawat siya og subpoena, ilabi na kay partisipante ra siya sa maong kalihokan.
Bisan pa man sa kahadlok, gipaabot gihapon ni Pelayo ang iyang kasuko ug mas lig-on nga determinasyon nga ipadayag ang iyang tingog batok sa korapsyon ug alang sa kaayohan sa katawhan.
Nasakitan usab siya sa kamatuoran nga silang mga kabataan nga nagpaabot lang sa ilang kasuko maoy unang napasakaan og kaso, samtang ang mga nangawkaw sa kaban sa gobyerno nagpabilin nga gawasnon.
Giklaro ni Pelayo nga walay nagpugos o nagsugo kaniya nga moapil sa rally, kay kini iyahang kabubut-on.
Sumala pa niya, nasuko siya sa panghitabo nga imbes magamit unta ang kuwarta sa katawhan para sa mga maayong proyekto, gikawatan hinuon sa mga tiwaling opisyal.
Gihimug-atan usab ni Pelayo nga ang Batas Pambansa 880 o Public Assembly Act dapat nang ibasura, kay dili kini alang sa katawhan, kundili alang ra sa mga anaa sa pwesto.
Gipaabot usab niya ang iyang mga pangutana sa kapulisan, kung nganong sila ang mipasaka og kaso batok sa mga estudyanteng nagprotesta.
Matod pa ni Pelayo, sila unta ang gilauman nga moprotektar sa katawhan batok sa mga kurap, apan karon, sila pa ang nagbantay ug nagpanalipod sa mga tiwaling opisyal.
Inay ang mga nangurakot maoy pasakaan og kaso, sila pa hinuong mga kabataang nagpaabot sa ilang kasakit ug kasuko batok sa pagpangurakot sa gobyerno.
