Gikumpirmar ni House Speaker Faustino “Bojie” Dy nga nangayo siya og tabang sa Department of Justice (DOJ) aron kanselahon ang pasaporte ni resigned Ako Bicol Partylist Rep. Zaldy Co taliwala sa mga imbestigasyon sa iyang giingong papel sa kurapsyon sa mga proyekto sa flood control.
Matod ni Speaker Dy, gipatawag dayon niya si kanhi Secretary of the Justice Jesus Crispin “Boying” Remulla, nga karon maoy bag-ong Ombudsman, human ni-resign si Co niadtong Septiyembre 29 aron mangayo og dinaliang aksyon aron pugngan ang iyang pagbiyahe sa gawas sa nasud.
Gipasabot ni Dy nga bisan og walay hurisdiksyon ang DOJ sa pagkanselar sa pasaporte ni Co, nangayo lang siya og tabang sa ahensya tungod kay kini ang nagdumala sa Bureau of Immigration ug makatabang kini sa pagpadali sa proseso sa koordinasyon.
Sa laing bahin, gipasalig ni Remulla nga mohimo og tukmang aksyon ang DOJ sa labing daling panahon.
Matod sa House Speaker, gihangyo usab sa DOJ ang Department of Foreign Affairs (DFA) nga mohimo og inisyatiba sa pagkanselar sa pasaporte ni Co.
