Gipasidunggan sa Police Regional Office 7 ang mga nagkandaiyang ahensya sa gobyerno nga nagkahiusa sa pagtubag sa 6.9 magnitude nga linog nga niigo sa Amihanang Sugbo niadtong Setyembre 30, 2025.
Ang maong kalihokan kay gipangulohan ni PBGEN Redrico Maranan, ang Regional Director sa PRO 7 diin tagsa-tagsa niini nga gipasalamatan ug gihatagan og pasidungog ang mga walay puas ug nipakita sa ilang kinasing-kasing nga pagserbisyo sa mga Sugboanon taliwa sa kakuyaw gumikan sa mga makalilisang gihapon nga mga aftershocks.
Gihimug-atan sa opisyal ang kamahinungdanon sa dinaliang pagtubag sa mga emehensiya o sa panahon nga moigo ang katalagman, diin mao kini ang gipakita sa mga nagkandaiyang ahensya nga milahos dayon paingon sa Norte aron sa pagpahigayon sa mga operasyon.
Gidayeg usab niini ang gipakita nga maayong leadership ni Cebu Governor Pamela Baricuatro nga maoy personal nga nimando sa search, rescue ug recovering efforts, busa alang kang Regional Director Maranan, usa kini ka maayong kinaiya nga kinahanglan anaa ang matag lider.
Gihatagan usab niya og pagdayeg ang uban pang mga ahensya nga niabag sa operasyon lakip niini ang Department of Social Welfare and Development Central Visayas, Bureau of Fire Protection 7, Bureau of Jail Management and Penology, PH Navy, Office of Civil Defense 7 ug daghan pang uban.
