Gitinguha lang sa mga pamilya sa biktima sa madugoong war on drugs ubos sa kanhi aministrasyon nga maipresentar ang ilang habig ug mga ebidensya kung giunsa pagpatay ang ilang mga minahal sa kinabuhi.
Kini ang subling gipasabot ni Atty. Neri Colmenares, former Bayan Muna Partylist Rep. ug Human Rights Lawyer nga confirmation of charges lang ang gipangayo sa mga kabanay sa mga biktima aron tan-awon kung aduna ba’y probable cause ang kaso o wala batok kang kanhi Presidente Rodrigo Duterte.
Hinungdan nga hugot sila nga nanghinaot nga mahatag ug mahinayon na ang pagdungog diin kapila ka higayon nga gilangay tungod sa mga nagkandaiyang rason.
Gihimug-atan usab ni Atty. Colmenares nga ang confirmation of charges kay usa lang ka lakang aron matumbok kung guilty ba o acquitted ang kanhi, ingon man nga kung gani mahinayon na ang kumpirmasyon kay mahatagan usab og paglaom ang mga pamilya sa biktima nga adunay padulngan ang ilang pakigbisog nga makab-ot ang hustiya tungod sa war on drugs.
Kahinumduman nga gibasura sa International Criminal Court (ICC) ang petisyon sa kampo ni kanhi Presidente Rodrigo Duterte bahin sa hurisdiksyon sa korte diin gikalipay usab sa mga kabanay ang nahimong lakang.
Basi sa desisyon sa ICC Pre-Trial Chamber nga gi-isyu niadtong Oktubre 23, ilang gipadayon nga sila awtorisado nga ipadayon ang kaso batok sa kanhi presidente alang sa mga krimen batok sa katawhan.
Gidugang niini nga mahimo nilang atimanon ang kaso bisan kung ang krimen nahitabo sa Pilipinas.
