Nagpadayon ang mga rescue ug relief operations sa Jamaica, upat ka adlaw human miigo ang Hurricane Melissa, nga hinungdan sa kaylap nga kadaot sa mga panimalay, linya sa kuryente, ug mga pananom.
Sumala sa mga taho, daghang mga komunidad ang nahimulag gihapon tungod sa mga natumbang kahoy ug mga poste, samtang ang mga residente napugos sa pagkalos og hugaw nga tubig gikan sa mga suba o pag-inom og tubig sa lubi.
Sa Westmoreland, makita ang mga debris gikan sa nahugno nga mga balay sa baybayon.
Samtang, si Social Security Minister Pearnel Charles Jr. ug uban pang mga emergency responder nagpadala og mga suplay sa hinabang, lakip ang mga ready-to-eat meals, tubig, mga trapal, mga habol, ug tambal.
Sumala sa World Food Program, ang nasud nakadawat og 2,000 ka kahon sa emergency food gikan sa Barbados, igo na aron makakaon og 6,000 ka mga tawo sulod sa usa ka semana.
Niining bahina, 60% sa isla ang wala pa’y kuryente, ug daghang mga residente ang naglakaw pa og lagyong distansya aron mangita og tabang.
Ang Hurricane Melissa usa sa labing kusog nga bagyo gikan sa Atlantic Ocean nga miigo sa habagatang-kasadpan sa Jamaica niadtong niaging semana isip usa ka Category 5, nga nakapatay usab og 28 ka mga tawo sa Jamaica ug 31 ka mga tawo sa Haiti.
