Nasagmuyo si Cebu Governor Pamela Baricuatro sa kaylap nga pagbaha sa Cebu taliwa sa kapin P26 bilyones nga flood control funds sa Sugbo.
Gikwesyon niini ang dakong kantidad nga wala makasulbad ug makapugong sa baha nga dala sa paghapak sa bagyong Tino.
Hinungdan nga mipagawas kini og kusganong pahayag bahin sa klaro nga kakuwang sa mga resulta sa mga programa sa kaluwasan sa baha.
Matud pa niini nga dili ikalimod ang gidak-on sa kadaot sa mga barangay sama sa Talamban, Bacayan, Basak Pardo, Talisay ug Busay, diin daghang mga residente ang naanod ug ang uban natabunan sa landslide.
Gipasiugda usab ni Baricuatro nga ang pagpangayo lang og mga update sa mga proyekto dili igo kay gikinahanglan ang klaro nga pag-audit ug pagrepaso sa implementasyon sa mga programa sa pagkontrol sa baha aron masiguro kung kini tinuod nga gipatuman ug asa paingon ang mga pundo.
Dugang pa sa gobernador nga magpadayon siya sa pagpakig-alayon sa Department of Public Works and Highways (DPWH) ug mga lokal nga opisyal aron mapadali ang imbestigasyon ug beripikasyon sa mga proyekto sa pagkontrol sa baha, labi na sa mga lugar nga dali ra bahaon matag tuig.
Samtang, nimando na usab si Presidente Ferdinand Marcos Jr. nga imbistigahan ang mga proyekto sa Cebu tungod sa kadaot sa Bagyong Tino.
Kini ang gipaambit ni Palace Press Officer Atty. Claire Castro, nga gusto masayran sa Presidente kung ang P26 bilyon nga gigahin alang sa mga proyekto sa flood control projects gigamit ba sa husto tungod kay nakita niya ang epekto sa bag-ohay nga bagyo nga daw wala molampos ang mga proyekto sa Cebu.
Dugang pa niini nga daghang mga Cebuano ang nasuko tungod sa ilang nasinati, susama usab ang gibati sa Presidente, busa ang mga napakyas sa paghatag og pag-atiman sa Cebu kinahanglan nga imbestigahan ug silutan ang angay silutan.
Subay niini, giawhag sa Palasyo si Baricuatro nga mokooperar sa imbestigasyon kung adunay kasayuran sa bisan unsang impormasyon nga makatabang sa imbestigasyon.
