Ipausab ni Department of Public Works and Highways Sec. Vivencio “Vince” Dizon ang mga flood mitigation sa Sugbo.
Kini human iyang nasawayan ang “Poorly planned and poorly executed” ang nagkantidad nga P1.9 bilyones nga Mananga River diin wala makapugong sa grabeng baha nga gidala sa Bagyong Tino.
Matud ni Dizon, ang mga natukod nga mga revetment walls sa Mananga River wala gayud naka-control sa taas ug kusog nga bul-og sa tubig baha hinungdan sa pagkaawas niini og pagbanlas ngadto sa mga kumunidad diin sa katapusang natala anaa sa 7 ang namatay ug 8 ang padayon pang gipangita.
Gihimug-atan ni Dizon nga angayan unta nga gihimong imprastraktura sa flood control mao ang pagtukod ug pipila ka mga dams ibabaw sa kabukiran diin magsubay ang Mananga River aron ma-kontrolar niini ang kusog nga bul-og sa tubig baha kung adunay bagyo ug dili kini moawas ngadto sa mga komunidad.
Hinungdan nga mipasalig si Dizon nga adunay mga pag-usab nga mahitabo sa mga plano sa flood mitigation projects, dili lang sa Talisay kondi apil na sa kinatibuk-ang Probinsiya sa Sugbo.
Isugyot usab ni Dizon nga mapondohan sa sunod nga nasudnong budget ang mga lakang sa bag-ong master plan sa flood control projects sa tibuok Sugbo ug gisuportoran kini ni Talisay City Mayor Gullas ug andam kini makig alayon sa naasoy nga sugyot.
Una niini, gihangyo usab ni Mayor Gullas si Gov. Pamela nga tabangan ang Talisaynon nga makabangon pagbalik ug maklatukod pagbalik og mga kapuy-an sa mga grabeng naapektuhan sa Bagyo.
