Wala napugngan sa usa ka amahan nga makahilak sa gidangatan sa iyang anak ug asawa human naapil og kaanod sa ilang balay atol sa kataas sa pag-igo sa Bagyong Tino sa Sitio Comon, Brgy. Bacayan, dakbayan sa Sugbo.
Atol sa pakighinabi sa Bombo Newsteam kang Tony Betinol, survivor sa Bagyong Tino diin iyang gipaambit nga nag-gakos ang iyang anak ug asawa sa dihang gisugat ang kabangis ni Tino.
Lakip usab sa namatay ang live in partner sa iyang anak apan dili kini kauban sa gihaya gumikan gikuha ang patayng lawas sa pamilya.
Dili na usab makahimo og balik si Betinol sa iyang lugar tungod sa maong panghitabo bisan paman nga 20 ka tuig na sila nga nagpuyo sa naasoy nga barangay.
Ingon man nga giingong mao kini ang unang higayon nga makasinati og grabeng kataas sa lebel sa tubig baha.
Nasayran nga 13 kabuok ang nakalas sa kabanay ni Betinol, duha niini ang iyaha nga mao sila si Gina Y. Betinol, 49-anyos, iyang asawa ug anak niini nga si Kevin Yosores Betinol, 23-anyos.
Samtang, gibasol karon ni Betinol ang buhatan sa DENR human nga gibakbak ang riprap nga maoy usa sa mga hinungdan nga dali nga nakasulod ang tubig gikan sa sapa nga giingong ayuhon apan gibiyaan niadtong pag-obserbar sa Kalag-kalag.
Ingon man nga wala usab gisalikway ni Betilon nga aduna silay sala kay wala dayon sila namakwit sa dihang gimandoan sila nga mobiya sa naasoy nga lugar.
