Dul-an sa 650,000 ka mga miyembro sa Iglesia Ni Cristo (INC) ang misalmot sa unang adlaw sa rally nga “Transparency for a Better Democracy” sa Quirino Grandstand niadtong Domingo sa gabii, Nobyembre 16, 2025.
Sumala sa Manila Disaster Risk Reduction and Management Office, gibanabana nga 650,000 ka tawo ang mitambong sa kalihokan sa alas 6 sa gabii.
Ang lihok-protesta nagsugod niadtong Domingo ug gikatakda nga magpadayon hangtod sa Martes, Nobyembre 18 diin ang mga partisipante nagsul-ob og puti nga sinina nga adunay mga pulong nga “Transparency for a Better Democracy.”
Ang rally nagtumong sa pagpalig-on sa panawagan alang sa transparency ug usa ka hingpit nga imbestigasyon sa giingong mga anomaliya sa mga proyekto sa flood control nga gipondohan sa trinilyon ka pesos nga pondo sa publiko.
Gipasiugda usab sa INC ang kamahinungdanon sa pagpanubag sa mga anaa sa luyo sa mga iregularidad sa mga proyekto sa imprastraktura sa gobyerno ug pagbawi sa bisan unsang nawala nga pondo gikan sa mga tawo.
Sumala sa tigpamaba sa INC ug ministro sa ebanghelyo nga si Kapatid Edwil Zabala nga ang protesta kay abli bisan sa mga dili miyembro sa ilang Simbahan.
Gipahibalo usab sa opisyal nga ipadayon nila ang ilang malinawong panawagan hangtod nga mapanubag ang mga naa sa luyo sa korapsyon.
Samtang, ang mga tolda nga gitukod sa mga liderato sa INC gikan sa T.M. Kalaw hangtod sa Luneta Park mamatikdan usab ug ang lokal nga gobyerno sa Manila nagabli usab sa tulo ka sports complex aron modawat og mga partisipante sa tibuok gabii sa ilang pagkatulog.
Gisuspenso usab ang mga klase (face-to-face) sa Manila samtang nagpadayon ang protesta.
