Daw makaayo sa pagkawala sa hait nga pandungog ang pagtumar sa inilang tambal nga makapabarog ug mapakabaskog sa kinatawhan sa lalaki.
Kini sumala sa bag-ong report sa usa ka pagtulun-an diin ang branded prescription medicine batok sa erectile dysfunction (ED) nga “Viagra” kay adunay potensyal nga makapanumbalik sa permanent type nga inherited hearing loss (pagkabungol).
Sumala sa maong pagtuon nga gipublisar sa The Journal of Clinical Investigation, nga ang gene nga gitawag og “CPD” kay maoy hinungdan sa pagkabungol o sensorineural hearing loss.
Ang mga scientist sa University of Chicago, University of Miami, ug pipila ka mga institusyon sa Türkiye ang mitaho nga ang maong kondisyon sa pagkabungol kay posibleng maulian sa pagtumar sa medikasyon nga pampabaskog ni “junior.”
Usa ka treatment nga “sildenafil”, ang active ingredient sa mga ED medications ang responsable niini.
Gipasabot sa mga eksperto nga ilang nasuta ang maong resulta pinaagi sa ilang komprehensibong eksperimento sa hearing organ ug sa reproductive organ sa mga kalalakihan.
