Sangko sa langit ang kasakit nga nabati sa usa ka anak sa gidangatan sa iyang inahan nga naapil sa naanod ug namatay sa daghang trabahante sa usa ka manukan sa Compostela Tamiao 2 atol sa kasagsagan sa Bagyong Tino niadtong Nobyembre 4.
Atol sa pakighinabi sa Bombo Newsteam kang Richvell Clina Campania, anak sa biktima diin nahimo kini nga emosyonal sa pagsaysay sa mga nakuha nga impormasyon gikan sa mga nakaluwas sa trahedya.
Matud niini nga basi sa pamahayag sa live-in partner sa iyang inahan nga maoy security guard sa manukan kay gipakatkat pa kini sa poste ug gisiguro nga safe ug dili kini maabtan sa paspas nga pagbulhog sa tubig baha gikan sa sapa nga anaa duol sa manukan.
Tungod sa wala damha nga pagsaka sa tubig baha, naanod ang live-in partner sa iyang inahan ug nasangit sa usa ka punoan sa lubi nga mao ang niluwas sa iyang kinabuhi ug gatuo nga luwas ra ang biktima kay mao kini ang giuna apan giingong natumba ang poste nga maoy gikatkatan sa inahan ni Richvell ug dayon na kining gianod ug namatay.
Gidugang pa ni Richvell nga dili unta mamatay ang iyang inahan kung gani wala sila gipaduty niadtong higayona apan tungod giingong ni-message ang HR sa maong kompanya nga dili mo-absent gumikan adlaw kini nga lunes.
Kini taliwa sa giluwat nga advisory nga anaa na sa Signal no. 4 ang Compostela ug gikanselar na usab ang mga trabaho sa tanang pampubliko ug pribadong establishmento, ingon man ang mga klase, gipa-duty gihapon sila niadtong gabii sa Nobyembre 3.
Ingon man nga kusganong gilimod sa kompanya nga walay duty ang ilang mga trabahante niadtong higayona apan gitubag kini sa igsuon sa biktima ug miingon nga kung walay duty, nganong naka-uniporme pa kini.
Mao kini ang gipaambit ni Richel Maribao Campania, igsuon sa biktima ug wala usab niini napugngan ang iyang emosyon sa paghinumdom sa dihang giingnan sila sa tag-iya nga dili ra sila ang nawad-an tungod kay nahanaw usab ang ilang kabtangan.
Gawas sa paghimakak giinging wala usab nitunol ang kompanya og hinabang ngadto sa pamilya.
