Gikoronahan nga Miss International 2025 si Catalina Duque Abreu sa Colombia atol sa coronation night sa ika-63 nga edisyon sa pageant nga gipahigayon niadtong Huwebes, Nobyembre 27 sa Tokyo, Japan.
Gipasa ni Miss International 2024 Huỳnh Thị Thanh Thủy ang korona ngadto kang Catalina isip iyang successor sa bag-o lang natapos nga prestihiyosong pageant.
Ikaupat nga Colombian beauty queen si Catalina nga nakadaog sa titulo nga Miss International. Ang mga nangaging beauty queen gikan sa Colombia mao sila si Stella Márquez (1960), Paulina Gálvez (1999), ug Jeymmy Vargas (2004).
Samtang ang pambato sa Pilipinas nga si Myrna Esguerra napili nga 4th runner up, si Melliza Xaviera Yulian sa Indonesia napili nga 3rd runner up, si Paola Guzmán sa Bolivia napili nga 2nd runner up, ug si Yollanda Chimbarami sa Zimbabwe napili nga 1st runner up.
Ang Miss International usa sa mga iladong “Big Four” nga internasyonal nga mga beauty pageant, uban sa Miss Universe, Miss World ug Miss Earth.
