Subling giawhag ni Cebu Archbishop Alberto “Abet” Uy ang publiko nga kalimtan una ang panagbangi sa politika, ingon man ang nagkandaiyang partido atol sa pagsalmot sa umaabot nga “SuPaKK: Sugboanong Fight Against Corruption” prayer-march rally karong Nobyembre 30.
Hinungdan nga gitataw sa Arsobispo nga kinahanglan nga magsul-ob og puti nga sinina isip simbolo nga nagkahiusa ang tanan ug simbolo sa limpyo nga pangandoy sa transparency, accountability, good governance, ug lig-on nga baruganan batok sa kurapyon.
Busa, giawhag niini ang tanang Sugboanon nga ipatigbabaw ang gugma sa kalinaw ug hustisya, makighiusa sa pag-ampo ingon man nga mangita og paglaom sa pagtuo.
Sa pikas bahin, nihatag na og pagtugot si Cebu City Mayor Nestor Archival sa pagpahigayon og anti-corruption rallies sa dakbayan nga nagpasiugda sa iyang suporta.
Kini human sa pagkumpirmar ni Archival nga ang mga organizer sa rally nangayo og permit gikan sa gobyerno sa siyudad, nga iyang giaprobahan nga walay pagduha-duha.
Hilabi na nga uyon kini sa adbokasiya ug tumong sa panagtapok, apan giklaro niini nga bisan gisuportahan niya ang adbokasiya batok sa corruption, nagpabilin siyang neutral sa partisan sides.
Uban sa naaprobahan nga mga permit, ang koordinasyon sa Philippine National Police (PNP) gisugdan usab alang sa pagpatuman sa mga lakang sa seguridad atol sa pagpahigayon sa rally.
Gipasabot ni Archival nga ang mga kahikayan sa seguridad nagsunod sa mga standard operating procedures, nga adunay gitudlo nga mga lugar alang sa mga rally nga gi-coordinate sa Archdiocese, interfaith groups, ug civic organizations.
