Gihikay sa lungsod sa Samboan sa habagatang Sugbo ang pinakaunang Cebu Provincial Youth Commission nga gipasiugdahan sa Kagamhanang Lalawigan.
Gipahinabo ang kalihokan sa Manuel L. Quezon Elementary School diin nakatapok kini sa 400 ka nga senior high school students nga gikan sa Samboan National High School.
Kini ang first-leg sa province-wide caravan nga nag-abli sa duha ka dagkong learning sessions nga mao ang “Mental Health & Suicide Prevention” ug “Heart to H.E.A.R.T. Talk” nga gidalit sa nagkadaiyang propesyonal sa maong hisgutanan.
Ang hisgutanan sa “Mental Health & Suicide Prevention” nagpunto sa pag-abag sa mga estudyante sa pag-ila sa mga early warning signs, pagdevelop sa mga coping strategies, ug pagsabot sa importansya sa pagpangayo ug tabang sa higayong muagi sa huna-huna ang pagkutlo sa kaugalingong kinabuhi. Gipangulohan ang diskusyon ni Capitol Executive Assistant Mikee P. Empaces nga usa ka rehistradong psychometrician.
Samtang ang “Heart to H.E.A.R.T. Talk” kay usa ka komprehensibong diskusyon nga nakatutok sa HIV/AIDS ug STI awareness, early sexual encounters, adolescent sexuality, reproductive health, ug teenage pregnancy prevention nga gipangulohan ang diskusyon gikan sa mga peer educators sa ALAGAH VII nga sila Roman Cisneros Jr. ug Licianne Fajardo.
Sa samang kalihokan si Cebu Provincial Governor Pamela “Pam” Baricuatro kay mipadangat sa iyang mensahe sa tumong nga ipanumbalik ang kahigayonan nga madungog ang tingog sa kabatan-onang Sugboanon sa mga polisiyang ipatuman sa Kapitolyo ubos sa iyang 8-Point Youth Development Agenda.
