Gi-inagurahan sa Philippine Air Force (PAF) ang pinakabag-o niining Full Motion Flight Simulator ubos sa inisyatiba sa Horizon 1 Project (RA 10349) nga gilauman makapalambo sa modernisasyon ug kapabilidad sa maayong pagbansay-bansay sa mga kasundalohan.
Ang proyekto naglakip sa acquisition sa usa ka Full Motion Flight Simulator diin adunay kiniy duha ka interchangeable cockpits sa S-70i Black Hawk ug Bell 412EP helicopters.
Ang simulator package kay aduna nay Integrated Logistics Support (ILS) component nga nagsiguro sa long-term operability, maintenance, ug sustainability niini.
Gipalit kini gikan sa usa ka Romanian-based training and simulation company nga Simultec S.R.L. sa balor nga P243.34-milyones.
Gani sa pakighinabi sa Bombo Radyo Cebu News Team kang Col. Ma. Christina Basco, ang tigpamaba sa PAF nga gibutang sa BGen. Benito Ebuen Air Base sa Lapu-lapu City ang maong bag-ong ekipo tungod kay ang maong base militar kay nakapahimutang sab sa ubang training assets sa Hukbong Panghimpapawid.
