Nisang-at og reklamo ang Association of Boxing Alliances in the Philippines (ABAP) sa mga organizer sa Southeast Asian Games tungod sa kontrobersyal nga judging sa boxing.
Matod ni ABAP chairman Ricky Vargas, sa unang unom ka adlaw sa away, daw adunay milagro kay miresulta kini nga siyam ka mga boksidor gikan sa Thailand ang nakasulod dayon sa finals.
Ilang gibutang sa ilang suwat nga dako ang ilang kasagmuyo ug kalagot tungod sa maong hitabo, busa angayan nga mopasabot ang SEA Games organizers.
Usa sa ilahang gitumbok mao ang kontrobersyal nga kapildihan ni Hergie Bacyadan ngadto kang Baison Manikon sa women’s 70 kgs. kung diin, gihatagan pa si Bacyadan og standing eight count ug deduction apan nagtabla ang duwa human sa duha ka round.
Lakip sa ilang gireklamo mao ang pagkapildi nila ni Pinoy boxers Riza Pasuit, Ian Clark Bautista, Junmilardo Ogayre ug Mark Ashley Fajardo sa mga Thai boxers nga nakigtigi.
Gidasig karon sa ABAP ang mga boksidor sa nasud nga mas mokombati tungod kay seguradong makigsangka sila sa mga Thai boxers inig-abot sa finals.
