Mitaliwan na ang kanhing Undersecretary sa Department of Public Works and Highways (DPWH) nga si Maria Catalina Cabral human siya makit-an sa lalom nga bahin sa Kennon Road, sakop sa Tuba, Benguet.
Gikumpirmar kini sa Benguet Police human sa insidente nga nahitabo hapon sa Disyembre 18.
Base sa inisyal nga imbestigasyon sa mga awtoridad, padulong unta si Cabral sa La Union, apan, pag-abot sa bahin sa Maramal, Camp 5, Camp 4, nihunong ang ilang sakyanan ug nagpabilin siya sa mao nga dapit pasado alas-3 sa hapon.
Matud pa sa pulisya, mibalik ang drayber pasado alas-5 sa hapon apan wala na niya makita ang kanhing opisyal sa DPWH.
Tungod niini, alas-7 sa gabii, nangayo na siyag tabang sa kapulisan.
Human sa search operation, nakit-an si Cabral nga wala nay kinabuhi sa ubos sa pangpang nga gibanabanaang 30 metros ang giladmon.
Si Cabral usa sa mga girekomenda sa Independent Commission for Infrastructure (ICI) nga pasakaan og kaso tungod sa iyang gituohang pagkalambigit sa anomaliya may kalabotan sa mga proyekto sa pagkontrol sa baha.
Tungod niini, gimandoan sa Office of the Ombudsman ang Benguet Police nga tipigan ug siguruhong mapreserba ang mga personal nga gamit ni Cabral, lakip na ang iyang cellphone ug uban pang electronic gadgets, alang sa dugang nga imbestigasyon.
Padayon pa nga giimbestigahan sa mga awtoridad ang kahimtangan ug hinungdan sa maong insidente.
