Nagkagubot ang Parliament sa Albania human atol sa pagpanumpa sa bag-ong Ombudsman nga si Endri Shabani, diin ang video nagpakita sa pipila ka mga magbabalaod nga nagprotesta ug nagdagkot pa gani og mga flare, ingon man naglabay og papel ug botelya sa liderato sa mayoriya nga Socialist Party.
Nasabtan nga ang tensyon nagsugod sa kontrobersyal nga pagkapili ni Shabani, kinsa gisuportahan halos sa Socialist Party, ug ang panaglalis gipasamot pa sa nagpadayon nga mga imbestigasyon sa korapsyon, lakip ang usa ka kaso batok kang Deputy Prime Minister Belinda Balluku, kinsa giakusahan nga nag-abuso sa iyang gahum sa mga proyekto sa imprastraktura.
Apan, gipanghimakak ni Balluku ang mga pasangil, nga gisuportahan ni Prime Minister Edi Rama.
Sa samang higayon, usa ka imbestigasyon ang gihimo usab sa giingong manipulasyon sa mga kontrata sa National Agency of Information (AKSHI), diin duha ka opisyal ang gibutang ubos sa house arrest.
