Hingpit nang naabut sa Mactan-Cebu International Airport si Sara Discaya, ang nanag-iya sa St. Timothy Construction, nga nalambigit sa anomaliyang flood control project sa Davao Occidental kagahapong adlawa, Biyernes pasado alas 6:32 sa gabie.
Gidala si Discaya gumikan sa pag-surrender niini ngadto sa Central Office sa National Bureau of Investigation og nunot usab sa mando sa Korte Suprema nga ihikay sa Lapu-Lapu City Regional Trial Court sa kaso niini nga P96.5-milyones nga ghost flood control project sa Davao Occidental.
Human nga miabot sa MCIA si Discaya, gisugat kini sa mga sakop sa National Bureau of Investigation-Central Visayas nga gipangulohan ni Regional Director Atty. Renan Oliva og gidala kini ngadto na sa Lapu-Lapu Hall of Justice aron ihikay ang kasong graft sa Regional Trial Court Branch 27.
Matud ni Regional Director Oliva, nga gibalhin si Discaya ug laing 8 ka mga opisyal sa DPWH sa Davao Occidental gumikan sa mando sa Korte Suprema og mao usab kini ang usa sa 27 ka mga korte nga nagkupot sa mga special graft cases nga doul sa Rehiyon 11.
Dugang pa niini nga ipaubos una sa medical examination si Sara Discaya ug laing 8 ka mga opisyal nga nalambigit una i-turn over sa Bureau of Jail Management and Penology, aron isud sa Lapu-Lapu City Jail.
Gihimug-atan ni Oliva, nga walay special treatment nga ihatag ni Discaya og sa laing 8 ka mga opisyal nga nalambigit sa flood control project anomalies og gidugang usab niini nga hagit sa buhatan sa NBI-Central Visayas ang pabiling luwas ang mga akusado.
Mipasalig usab sa opisyal nga luwas ra ang kahimtang sa mga akusado sa mga pasilidad sa Lapu-Lapu City Jail.
