Gibutang na sa Red Alert status ang Bureau of Fire Protection (BFP) Central Visayas isip pagpangandam alang sa selebrasyon sa Pasko ug sa pagsaulog sa Bag-ong Tuig.
Sumala ni FCSupt. Fred Trajeras Jr., regional director sa BFP 7, nagtumong ang BFP 7 og zero casualty sa mga insidente nga may kalabutan sa pabuto.
Hinungdan, nga iyahang gimando ang hugot nga pagmonitor sa mga lugar nga gitudlo nga firecracker-and-pyrotechnics-selling zones sama sa South Road Properties (SRP) sa Cebu City.
Uban sa pagpataas sa Red Alert status, ang mga personahe sa bombero andam na kung adunay emerhensya.
Nagpaabot usab kini sa mainiton nga pagtimbaya sa Pasko, uban sa iyang mensahe sa pagpangandam ug pagbantay, ingon man ang pagpahinumdoman sa tanan nga magpraktis sa fire safety para sa luwas, malinawon, ug walay sunog nga selebrasyon sa Pasko.
Gipasidunggan ni Trajeras ang mga fire station ug ang ilang mga personahe tungod sa ilang kaisog, dedikasyon, ug kahusayan sa serbisyo, labi na sa panahon sa mga natural nga kalamidad.
