CEBU- Wala mahimutang, wala makatulog og tarong, ug nagpabiling mura’g damgo ang tanan alang sa ika-76 nga milyonaryo sa Bombo Millionaire’s Club—human siya ang napiling pinakabulahan ug pinakaswerte nga nabunotan sa Grand Draw isip kompirmadong 1 Million winner sa One Two Panalo Part 24 promo, nga gipahigayon niadtong Sabado, Disyembre 27, 2025.
Kini ang emosyonal nga gipaambit ni Lina Tomaquin, 48 anyos, taga Barangay San Isidro, Talisay City, Cebu. Matod pa niya, bisan pa sa iyang kanunay nga paghulog og entries matag semana sa Bombo Radyo, dili gyud siya katuo nga tali sa daghang naglaum ug nagdamgo, ang iyang ngalan ang mabunotan. Ang produktong Orocan maoy nagdala sa dakong kadaugan nga iyang wala gayod gilauman.
Gipaambit ni Lina nga puno sa kasakit ug pagsulay ang miaging tuig alang kaniya ug sa iyang pamilya, ilabi na kay bag-o lamang nga mitaliwan ang iyang inahan, usa ka pagkawala nga dili lamang emosyonal nga kasakit ang gibilin, kondili usab dakong kabug-at sa gasto sa tambalaan.
Tungod niini, matod pa ni Lina, dili lamang kuwarta ang iyang nadaugan, kondili usa ka paglaum nga iyang gamiton isip puhunan sa iyang gamay nga tindahan, samtang ang uban niini iyang itigom alang sa pag-eskwela sa iyang anak nga mosulod na sa kolehiyo.
Sa taliwala sa kalipay ug luha, dako ang iyang pasalamat sa Bombo Radyo ug Star FM, ingon man sa tanang product sponsors, nga matod pa niya, dugay na’g kauban sa iyang inadlaw-adlaw nga panginahanglan ug karon nahimong tinubdan sa bag-ong paglaum alang sa iyang pamilya.
Samtang, gawas sa milyonaryo sa Cebu, adunay usa ka Consolation Prizes, nga makadawat og ₱5,000 ang naggikan sa Cebu nga si Margarita Getes, 75-year-old, taga Sityo Plus, Inayawan, Cebu City ang nagdala sa iyahang kadaugan kay Orocan.
Sa pagtak-op sa atuang Promo mga ka-Bombo amoang pasalamat sa tanang nisalmot gikan sa week 1 hangtud sa Grand Draw.
Atangi usab ninyo ang musunod nga pa-promo ug pa-premyo nga ihatud sa amoang Sibyaanan.
