Makakugang ug makapasubo ang nahitabo sa nasud nga Switzerland, ilabi na gayud sa usa ka ski resort sa Crans-Montana, Swiss Alps, diin adunay dakong sunog nga mi-ulbo subay na sa pagsugat sa bag-ong tuig 2026.
Basi sa mga inisyal nga report, aduna nay 40 ka kinabuhi ang nakalas sa maong makalilisang nga panghitabo, diin adunay gatosan usab ang giingong naangol.
Subay niini, ekslusibong gikab-ot sa Bombo Radyo Cebu Newsteam ang linya ni Emelisa Lauron Becker ang Bombo International Correspondent sa Switzerland, diin iyang gikabutyag nga wala pa siya’y nadawat nga mga taho nga kompirmadong adunay Filipino nga nalakip nga nadisgrasya ug namatay sa nahitabong sunog sa usa ka Bar sa ski resort sa Crans-Montana, Swiss Alps, Switzerland, apan adunay mga bakasyonista sama sa mga foriegn nationals ang nalakip sa maong trahedya.
Gidugang ni Lauron Becker nga aduna siya’y nasayran nga adunay usa ka indibidwal nga nag selebrar sa iyahang adlawng natawhan nga dungan usab sa selebrasyon sa bag-ong tuig, ug gituohang adunay gidagkotan sama sa kandila hinungdan nga dali nga mikatap ang kalayo sa palibot sa naasoyng dapit.
Naasoy usab niya nga dul-an o anaa sa mga dosentoson ang gidaghanon sa mga tao nga anaa sa maong resort, hinungdan nga dako ang numero sa mga casualties, ug matod niya, sa iyahang napunit nga mga taho, kapin sa gatos pa ang nagpabiling nangaangol.
