CEBU CITY- Dali nga gisulbad sa Department of Public Services (DPS) ang hugaw nga nabilin sa kadalanan human sa selebrasyon sa Sinulog 2026 gahapon Enero 18, aron mabalik dayon ang kahapsay ug kalimpyo sa siyudad.
Sa pakighinabi sa Bombo Newsteam, gipadayag ni DPS Head John Paul Gelasque ang iyang kalipay tungod kay mas sayo silang nahuman sa clearing operations karong tuiga.
Gibutyag niya nga sa wala pa ang alas-6 sa buntag kaganina, Enero 19, limpyo na ang kadalanan sa syudad.
Gisugdan ang operasyon sa alas-7 sa gabii niadtong Dominggo gikan sa mga boundary sa Talisay, Mandaue, ug Busay, ug hinay-hinay nga mikanaog ang mga cleaners paingon sa sentro sa siyudad hangtod nga ang operasyon sa Fuente Osmeña napahuman sa alas-5:35 sa buntag.
Gihatagan og prayoridad ang mga dapit nga sagad dagsa-on sa bagang panon sa katawhan ug gilaumang daghan og basura, sama sa Plaza Independencia, Vicinity sa Basilica Minore del Sto. Niño, Colon Night Market, ug General Maxilom Avenue (Mango Avenue).
Gipaambit ni Gelasque, nga nahimong malampuson ang operasyon tungod sa pagtinabangay sa mga personahe sa DPS, Cebu City Environmental Sanitation Enforcement Team (CSET), ug mga driver ug loader gikan sa nagkalain-laing barangay.
Sa dihang gipangutana bahin sa mga nag-unang basura nga nakolekta, gipaambit ni Gelasque nga bisan pa sa pagkatap sa mga “eco-stations” sa tibuok rota, ang labing daghang nakolekta gihapon mao ang empty plastic water bottles.
Nipaabot og dakong pasalamat si Gelasque sa mga street sweepers tungod sa ilang kakugi ug bayanihong buhat. Iyang gihimug-atan nga dili angay minusan ang ilang trabaho kay dako kini og ikatabang sa katilingban.
Nanawagan usab siya sa publiko nga magtinabangay sa pagmentenar sa kalimpyo pinaagi sa saktong paglabay sa basura sa tanang panahon, dili lang kon adunay dagkong selebrasyon.
