MANDAUE CITY, CEBU- Gipahigayon sa Bureau of Jail Management and Penology (BJMP)–Mandaue City ang mass release sa 31 ka kwalipikadong Persons Deprived of Liberty (PDL) ubos sa Good Conduct Time Allowance (GCTA) program, isip kabahin sa Sinulog 2026.
Ang kalihokan gipahigayon ubos sa tema “Kagawasan ug Paglaum: Gasa gikan sa Bala’ang Bata,” nga nagsimbolo sa kagawasan ug bag-ong paglaum isip panalangin gikan sa Sto. Niño.
Sumala ni JSupt. James D. Gingoyon, Warden sa BJMP–Mandaue City, ang gipagawas nga mga PDL napili tungod sa ilang maayong pamatasan ug aktibong partisipasyon sa nagkalain-laing rehabilitation ug reformation programs sulod sa pasilidad sa bilangguan.
Gipasiugda sa BJMP nga ang maong inisyatibo nagpakita sa ilang padayong pasalig sa rehabilitasyon ug reintegration sa mga PDL, aron hatagan sila og ikaduhang higayon nga matukod pag-usab ang ilang kinabuhi ug mahimong produktibong miyembro sa komunidad.
Dugang pa, gipahinumduman sa BJMP nga ang Sinulog dili lamang selebrasyon sa pagtuo ug kultura, kundili usab selebrasyon sa kalooy, kapasayloan, ug bag-ong pagsugod, nga tinuod nga espiritu sa pista sa Bala’ang Bata.
