Wala na usab mipatim-aw si Senador Ronald “Bato” Dela Rosa sa dihang mibalik ang sesyon sa Senado niadtong Lunes. Human sa katapusang pagtungha niini niadtong Nobyembre sa miaging tuig.
Sa dihang giablihan pag-usab ang sesyon sa Senado, 22 lang ka senador ang mitambong, ug si Dela Rosa ra ang wala.
Sa usa ka ambush interview, si Senate President Vicente “Tito” Sotto III miingon nga wala pa niya personal nga nahimamat ang senador.
Nakurat usab kini kon giunsa niya pagpirma ang minority report nga gipagawas sa minority bloc kalabot sa hearing sa blue ribbon committee bahin sa giingong mga anomaliya sa mga proyekto sa flood control.
Dugang ni Sotto nga wala usab siyay kalabotan sa nahimutangan ni Dela Rosa.
Bisan pa, wala na makita si Dela Rosa sukad sa iyang katapusang pagtungha sa Senado niadtong Nobyembre sa miaging tuig kalabot sa giingong pagserbisyo sa warrant of arrest batok kaniya gikan sa International Criminal Court bahin sa iyang partisipasyon sa gubat batok sa droga atol sa administrasyong Duterte diin siya nag-atubang og kaso nga Crimes against humanity.
