Milusad og pormal nga imbestigasyon ug miisyu og Show Cause Order ang buhatan sa Land Transportation Office – Central Visayas (LTO) batok sa TV reporter nga nalambigit sa hit-and-run accident sa kadalanan sa dakbayan sa Sugbo niadtong nakalabayng Biyernes, Enero 23, 2026.
Sumala sa LTO-7 nga ilang nasuta nga nagmaneho ang sad-an nga giilang si alyas “Berto” samtang impluwensiyado kini sa ilimnong makahubog nga direktang kalapasan sa RA 10586 o ang Anti-Drunk and Drugged Driving Act of 2013.
Isip tubag kabahin niining panghitabo, mag-atubang oga kasong kriminal si Berto nga ipasaka sa mga kapulisan ug laing silot atubangon niini sa preventive suspension sa iyang driver’s license sulod sa 90 ka adlaw.
Ingon man nga aduna pay pending nga resolution kabahin niining kasong administratiba diin gitun-an sa ahensya ang posibilidad sa permanent revocation sa driver’s license ni Berto sa gitumbok nga “improper person to operate a motor vehicle.”
Kahinumduman nga niatong Enero 23 sa alas 10:50 sa kagabhion nakabangaan ang gimanehong company service vehicle ni Berto sa usa ka SUV sa dalan Escario ning dakbayan sa Sugbo diin imbes nga mutabang nga miikyas kini sa maong dapit hiungdan nga gigukod sa laing mga motorista ug givideohan kini hangtod sa iyang pagkasikop kauban ang mga sakop sa kapulisan sa Barangay Tisa.
Padayong pahimangno sa ahensya sa publiko nga ang “road rage” ug “reckless driving” kay dili lamang kalapasan sa lagda sa trapiko apan usa ka seryosong hulga sa kaluwasan sa publiko. Ang pagbuhat sa ingon nga pamatasan sa pagmaneho sa kadalanan kay usa ka legal nga basehan alang sa permanente nga pagbawi sa mga pribilehiyo sa pagmaneho.
