Miugdaw sa siyam ka mga panimalay ang mitumaw nga sunog sa Sitio Sagrada, Villagonzalo 1, Barangay Tejero ning dakbayan sa Sugbo niadtong Huwebes sa buntag, Pebrero 5, 2026.
Sumala sa Bureau of Fire Protection (BFP) Cebu City nga ang sunog nagsugod pasado alas 11:52 sa buntag nga daling mikatap sa mga panimalay hinungdan ang giisa kini sa unang alarma pag alas 11:54 ug sa ikaduhang alarma sa alas 12:02 sa samang kabuntagon.
Gani pipila ka minute ang milabay pag-alas 12:11 kay gi-report na kining under control ug fire out pag alas 12:35 sa udto sa kapin 40 minutos nga pagdilaab sa sunog.
Matod pa nga sa siyam ka balay nga gilamoy sa sunog kay pito niini ang totally burned samtang duha ang partially damaged.
Miabot sa 15 ka pamilyahan ang naapektuhan nga adunay 55 ka mga indibidwal.
Kasamtangang gipahimutang sa Tejero Elementary School ang mga biktima isip barangay evacuation center. Maayo nalang og walay dakong pagkaangol ang natala diin usa lang ang nakahiagom og gamayng samad samtang lain ang naglisod sa ginhawa.
sa pagkakaron, padyaon pa ang gilusad nga imbestigasyon sa kabumberohan aron matumbok ang hinungdan sa sunog.
