Miabot na sa 15 ang ihap sa mga tambalanan nga gidumala sa Kagamhanang Lalawigan sa Sugbo nga adunay 24/7 round-the-clock laboratory services.
Ang maong kalambuan kay kabahin sa tinguha sa kasamtangang administrasyon sa Kapitolyo nga maghatod og paspas ug mas madapit nga atensyong medical likop tibuok probinsya.
Ang nagpabilin nga tambalanan nga walay susamang serbisyo kay ang Daanbantayan District Hospital nalang sa amihanang Sugbo diin aduna lang kiniy eight-hour laboratory schedule sa pagkakaron. Apan mamahimo gihapon kini silang makapanghimulos sa 24/7 laboratory services sa kasikbit nga Cebu Provincial Hospital – Bogo City.
Ubos sa lagda sa Department of Health (DOH) sa medical staffing requirements nga upat ka mga provincial hospitals ang dapat adunay 19 ka medical technologist aron masustiner ang 24/7 rotation samtang ang mga island hospitals sa Bantayan ug Camotes kay gikinahanglan sa siyam ka medical technologists matag usa.
Samtang ang nabiling 10 ka tambalanan kay gikinahanglan sa lima ka medical technologists. Bugtong nga ang Daanbantayan District Hospital lang ang adunay upat.
Gitinguha karon sa Kapitolyo nga matuman kini nga rekisitos aron sa sento-porsyento na sa mga tambalanan sa probinsya ang adunay 24/7 laboratory services.
