Naluwas ang anaa sa 50 ka mga pasahero ug lima ka tripulante human nahagsa ang eroplano sa kadagatan sa Somalia.
Ang inisyal nga imbestigasyon nagbutyag nga ang eroplano sa Starsky Aviation Fokker 50 nakasinati og mga teknikal nga problema pipila ka minuto human sa pag-takeoff gikan sa Mogadishu International Airport.
Samtang ang Civil Aviation Authority (CAA) sa Somalia midugang nga ang piloto mihangyo nga mobalik tungod sa problema apan wala mohunong sa runway ug nalabyan ang aspalto sa wala pa mahulog sa mabaw nga tubig.
Matod pa, ang mga pasahero luwas nga nakagawas sa eroplano human kini nahagsa sa Indian Ocean.
Subay niini, gidayeg nila ang paspas ug kalmado nga paghimo og desisyon sa piloto aron masiguro ang kaluwasan sa tanan, ug ang mga awtoridad nagpadayon sa pag-imbestiga sa insidente.
