Nidagsa ang mga Sugboanon ug mga turista sa inilang Taoist Temple sa Beverly Hills Subdivision aron sa pagsaulog sa Chinese New Year karong adlawa, February 17.
Sa pakigsuta sa Bombo Radyo Cebu Newsteam, namatikdan ang dako nga pundok sa mga tawo, dili lang mga Filipino-Chinese, nga nalingaw sa pagsuroy sa maong dapit samtang kasagaran kanila nagsul-ob og kolor puwa nga bisti isip simbolo sa “lucky color.”
Nagpasundayag usab og nagkadaiyang pakulo ang maong establisyemento aron paghatag og kalingaw ug “kabusganan” pinaagi sa mga libreng pagkaon nga giandam alang sa mga nidayo sa lugar.
Sa pakighinabi kang Marlyn Tampos, kinsa naggikan pa sa Dakbayan sa Lapu-Lapu uban ang iyang mga barkada, iyang gipaambit nga nalingaw ug nalamian sila sa mga pagkaon nga gi-serve sa templo.
Matod ni Tampos, bisan pa man og dili kini ang iyang unang higayon nga nakabisita sa Taoist Temple, kini ang unang higayon nga nituyo sila sa paglaag dungan sa selebrasyon sa Chinese New Year aron masinati ang tinuod nga kultura ug vibes sa maong kapistahan.
