Giila sa Police Regional Office 7 (PRO7) ang nagkalain-laing ahensya sa gobyerno, security forces, ug stakeholders nga mitampo sa malinaw ug hapsay nga pagdumala sa mga kalihukan nga may kalabutan sa ASEAN 2026 sa Central Visayas.
Ang paghatag og Certificates of Recognition gihimo atol sa flag-raising ceremony sa PRO7 Headquarters sa Camp Sergio Osmeña Sr. gahapon Pebrero 16, 2026, ubos sa pagpangulo ni Regional Director Redrico A. Maranan.
Kining mao nga pag-ila misunod sa malampusong pag-host sa ASEAN Tourism Forum sa Cebu ug sa serye sa ASEAN Senior Officials’ Meetings sa Bohol, nga natuman nga walay naitalang insidente tungod sa hugot nga koordinasyon sa nagkadaiyang ahensya.
Matud ni PBGen Maranan, ang kalampusan sa maong international engagements dili lamang tungod sa presensya sa seguridad, kundili usab sa panaghiusa, disiplina, ug maayong pagplano sa tanang institusyon nga nalambigit.
Gipasiugda usab sa opisyal nga ang maong kalampusan nagpakita sa kapasidad sa Pilipinas sa pag-host og high-level international events, ilabi na nga ang nasud mao ang ASEAN Chair sa 2026.
Samtang nagpadayon ang pagpangandam alang sa 48th ASEAN Summit nga ipahigayonon sa Cebu City sa Mayo 8 hangtod 9, 2026, gipahimangnoan sa PRO7 nga mas hugot nga pagbantay ug mas taas nga lebel sa kaandam ang gikinahanglan.
Sumala pa sa Regional Director, mas dako ang hagit sa ASEAN Leaders’ Summit tungod kay magtapok dinhi ang mga ulo sa estado ug gobyerno, hinungdan nga mas bug-at ang responsibilidad sa seguridad ug kahapsay.
Gimandoan na ang tanang yunit sa PRO7 nga ipadayon ang peak operational readiness, lakip ang pagrepaso sa deployment plans, pagpalig-on sa intelligence monitoring, ug pag-andam sa contingency measures.
Sa pagpadulong sa Central Visayas isip host sa ASEAN Leaders’ Summit, gipadayag sa PRO7 ang lig-on nga panumpa sa inter-agency unity, mas lig-on nga seguridad, ug pagpanalipod sa dungog sa Pilipinas sa atubangan sa international community.
