Mihukom ang Supreme Court of the United States nga ilegal ang pagpahamtang og mga taripa ni US Pres. Donald Trump sa nagkalain-laing mga nasud.
Sa mayoryang desisyon nga gi-isyu ni Chief Justice John Roberts, unom ka mahistrado ang mibotar pabor sa pagbasura sa lakang, samtang tulo ang misupak.
Sumala sa desisyon, ang United States Congress adunay eksklusibong gahum sa pagtugot ug pagpahamtang og mga taripa, ug dili kini mahimong ipatuman sa presidente nga walay klarong awtoridad gikan sa Kongreso.
Matud pa sa federal nga datos, sukad Disyembre 14, nakatigom ang gobyerno og kapin $134 bilyon nga kita gikan sa mga taripa nga nakolekta sa labaw sa 310,000 ka importer.
Kahinumduman nga niadtong 2025, nagpahamtang si Trump og taripa nga miabot hangtod 145 porsyento batok sa mga produkto gikan sa China.
Gihatagan usab niya og higayon ang ubang mga nasud nga i-adjust ang ilang taripa sa mga produktong sa US aron malikayan ang dugang nga pagtaas sa buhis sa pag-angkat.
Ang maong desisyon sa Korte Suprema gilauman nga adunay dakong epekto sa polisiya sa pamatigayon sa Estados Unidos ug sa relasyon niini sa ubang mga nasud.
