Nagpahigayon og dunggan nga pagtan-aw ang mga kabanay sa mga biktima sa dugoong Extrajudicial Killings (EJKs) diri sa Sugbo sa nahitabong unang Confirmation of Charges hearing sa International Criminal Court Pre-Trial Chamber 1 sa pagdungog sa kaso ni kanhi Presidente Rodrigo Roa Duterte kagahapong adlawa sa Lunes, Pebrero 23, 2026.
Ang maong kalihukan sa mga pamilya sa mga EJK victims kay inubanan sa National Union of People’s Lawyer – Cebu Chapter sa ilang matahom nga kalipay nga nagligid na ang ligid sa hustisya.
Apan sumala sa mga human rights groups nga nagpabili gihapon ilang kabalaka sa ilang seguridad tungod kay aduna gihapon impluwensya ang pamilyang Duterte ilabi na nga daw pipila sa mga mismong mipatay kay nagsuroy pa nga gawasnon.
Gikabutyag ni Dyan Gumabao, Interim Coordinator ug Vice Chair sa Rise for Life and Rights Philippines sa eksklusibong pakighinabi niini sa Bombo Radyo Cebu News Team nga nagtampo sila og tabang sa mga kabanay sa mga biktima kauban ang NUPL – Cebu ug KARAPATAN Central Visayas.
Panawagan sa maong grupo nga angayng gukdon sa kasamtangang administrasyon ang mga kaubang responsible sa pekeng “war on drugs” aron sab sa dungang higayon mapatubag sila sa ilang mga salaod.
Samtang sa pikas bahin, gisaysay sab ni Atty. Noemi Truya Abarientos sa NUPL – Cebu sa eksklusibong pakighinabi niini sa Bombo Radyo Cebu News Team nga masaligon sila sa proseso sa ICC sa maong kaso batok sa kanhi president.
Dugang pa niini nga ligdong ug maayo ang mga punto nga gipakita sa prosekusyon sa reklamong human rights violation sa administrasyon ni Duterte. Midason kini nga ang hukmanan sa ICC mao ang higayon sa kampo ni Duterte ug sa iyang tigpaluyo sa pagpamatuod sa ilang pangangkon nga epektibo ang war on drugs sukwahi nga tinuod nga panghitabo ug ihap sa istatistiko ug pagtuon.
