Nabati ang mga sunod-sunod nga buto-buto sa palibot tungod sa nagkagrabe nga tensyon tali sa Amerika ug Israel batok sa Iran, sumala sa taho ni Deney Astano, ang Bombo International News Correspondent sa Beirut, Lebanon.
Tungod sa kakuyaw, temporaryo unang nibakwit si Astano sa balay sa iyang amo aron masiguro ang iyang kaluwasan ug aron adunay makauban sa bisan unsa mang “simbako” nga mahitabo sa maong dapit.
Kini ang gipaambit ni Astano sa usa ka eksklusibong pakighinabi sa Bombo Radyo Cebu newsteam, diin iyang gidetalye ang ilang sitwasyon sa Lebanon taliwala sa walay hunong nga tensyon sa mga silingang nasud.
Gikabutyag usab ni Astano nga sa Beirut, Lebanon, wala silay magamit nga mga “bomb shelter.” Hinungdan nga sa dihang nagsugod na ang pagbinayloay og makamatay nga atake niadtong milabay nga semana, napukaw siya gikan sa iyang pagpahuway tungod sa makabungog nga lanog nga mga buto sa palibot.
Subay niini, gikompirmar ni Astano nga daling nipadangat ang Philippine Embassy sa Beirut og mga emergency hotlines ug listahan sa mga dapit nga mamahimo nilang bakwitan kon ugaling mas mograbe pa ang kagubot.
Gidugang usab niya nga gawas sa mga evacuation centers nga gi-post sa FB Page sa embahada, andam usab ang ilang lokal nga komunidad ug mga establishemento, sama sa mga simbahan, sa pag-akomodar kanila sa oras sa panginahanglan.
