Gipasalig sa Armed Forces of the Philippines (AFP) nga walay gituohang hulga sa pag-atake gikan sa Iran batok sa Pilipinas, taliwala sa nagkagrabe nga tensyon sa Middle East.
Sumala ni Rear Admiral Roy Vincent Trinidad, tigpamaba sa Philippine Navy, ang range sa missile system sa Iran limitado sa mga 2,000 kilometros, ug matod niya nga ang Pilipinas mga 7,500 kilometros ang gilay-on gikan sa Iran, busa dili klaro kung makaabot ba kini sa Pilipinas.
Dugang ni Trinidad nga bisan ang strategic US-UK military base nga Diego Garcia sa Indian Ocean dili maabot sa missile capability sa Iran.
Giklaro usab sa AFP nga ang mga lugar nga sakop sa Enhanced Defense Cooperation Agreement (EDCA) mga pasilidad nga gipanag-iya sa Pilipinas ug dili mga base militar sa Estados Unidos.
Gigamit kini alang sa humanitarian assistance, disaster response, ug joint drills uban sa mga kaalyadong nasud, ug dili isip mga offensive attack.
Sa sayo pa, adunay mga report nga ang mga EDCA site mahimong target sa Iran kung mograbe ang panagbangi tali sa Iran, Estados Unidos, ug Israel.
Apan, kusganong gipahayag sa AFP nga ang kasamtangang panagbangi usa ka isyu sa rehiyon sa Middle East ug nga ang Pilipinas wala nalambigit isip proxy sa panagbangi.
Nanawagan ang militar sa publiko nga magpabiling kalmado, mahimong kritikal sa impormasyon, ug mosalig lamang sa mga opisyal nga pahayag sa gobyerno.
